Jakarta, 16 July 2008

Mandapotton na huparsangapi jala na huhaholongi, dainang pangittubu di huta.

Horas ma inang nauli basa,

Hipas do hami dison, au borum dohot helam, songonima nang pahompum na tolu i, si Alex, si Bram nang si Tikkos, hipas-hipas do hami dison, suang songoni ma nian hamu pe inang nabasa, nauli lagu, sai anggiat ma dibagasan pangaramotion na sian Tuhatta pardenggan basa i na mangalehon akka hahipason dohot gajjang ni umur di hamu inang nauli lagu.

Inang nauli basa,

Ia pahoppum si Alex, ima pahompu siakkangan i, nunga be masuk kuliah ibana di Pelita Harapan, jala las do roha marnida, ai di haburjuhon jala dihagiotton do namarsiajar i. Molo binereng sian sitta-sittana, ikkon mabbuat S-3 manang doktor do ninna di Australia ibana, las roha tutu inong, jala ho pe inong, las ma roham mabbege i, ai gabe jolma na hasea do hape annon pinopparmon. Akkup ni i, mulai saonari nunga be hudepositohon hami tu bank hepeng nami, asa dung tammat ibana lima taon nai sian Jakarta on, adong modal pasikkolahon tu luar negeri.

Inong,

Songoni do nang pahoppum sibitonga i, ala dang olo talu ibana tu abangna, ikkon di Singapura do ibana ninna SMU, jala songon natua-tua na bertanggungjawab hami, huoloi hami do i. Alai, on ma sada nai pangidoanna, nang pe kalas tolu SMP dope ibana, nunga dipangido ibana sada mobil dalan-dalanna, ujungna di patulus helam do pangidoanna i, nunga dituhor sada mobil ima mobil Terrano sisaonari i, tole ma, inna roha, asalma burju sikkola.

Asing muse do pahoppum siappudan on, dang olo be mamakke sedan BMW na hutohor hami na taon na salpu i, didok ibana, diparekkeli donganna sasikkola do ibana ala dipakke sedan na leleng, jadi terpaksa ma hu cicil-cicil sada BMW nabaru sian showroom an, ipe asa songon na denggan huida bohina lao tu sikkola.

Inong,

Ai diingot hamu dope tahe, tikki ro hamu tu Jakarta on? Ima lima taon na salpu? Tikki i hea hupatuduhon tanotta na di Cibubur i? Ima tano na 2 hektar i? Nunga dipauli helam be sada jabu disi, ninna molo matua muse asa adong inganan parlape-lapean, jala molo ro inong sian huta asa songon na tenang tinggal di jabu, ala takkas diboto hamu inang, molo inganan nami sisaonari, ima huta Pondok Indah on, nunga tung mansai rame hian be. Jala minggu depan, naeng ro do martamue, atasan ni helam tu jabutta, ima Dirjen Pajak sisaonari. Jadi attusi inang ma ai ila do roha molo songon na so suman jabu manomu akka pejabat ni negara on. Jadi sude akka perabot na dijabu i nunga hugatti be dohot naimbaru, jala kolam renang nadipudi ni jabutta i pe nunga hubaen jala hupabolak sampe tu opat meter bolakna. Jala hubaen do sopo-sopo di tonga ni taman nadipudi ni jabu i, ai dipangido pahoppun siampudan i, molo ro donganna asa tu si nasida marpungu.

Inang naburju,

Marsogot, arisan do di jabu, ima akka arisan ni inatta ni pejabat. Jala asa unang maila au inang, borum nasasada on tu akka inatta ni dongan ni helam, bah nunga hutuhor be berlian horung dohot sibong. Molo di ingot inong i, hea tabereng di Mall Pondok indah, songoni do inong sipata, asa unang maila iba.

Jala helam pe, ai sadalan do dohot tu umur, didok ibana, dang soksok be ibana mamakke Mobil si saonari, ala ni i, na di bulan na salpu i, diganti ibana do mobil na i gabe Merci keluar terbaru. Jala ala sude do hami luhut nunga marmobil, ikkon pabolakon nami nama garasi ni jabutta i, asa muat sude. Jala tamba ma pengurupi dohot tukang taman saonari di jabutta on.

Inong na lagu,

Songoni ma jo barita sian hami borum dohot helam, ala tung mansai godang do pengeluaran nami di bulan on, bah marpanganju ma ho inang, DANG TARBAHEN HAMI DOPE MANGIRIM BALANJOM bulan on, ai sian pensiun ni bapa i ma jo pakke. Hurasa sukkup dope di inang i, so pola sadia be akka kebutuhanmu di huta. Jadi sotung unang pola boha roham inong, ala so boi hami mangirim tu ho bulan on, na lagi menipis do keuangan nami, hape depsito jala bungana na adong di bank pe dang tarbuat dope bulan on.

Sai Tuhanta ma namandongani hita ganup di ulaonta be, amen.

Borumu,
Nai Holit Mangging nyonya Sipanggaron

NB :
Adong dope hape na lupa inang.
Dang di Jakarta hami dua minggu na ro on, alana naeng lao hami marlibur, mardalani, tu Bangkok dohot tu Sanghai, China. Tangiakkon hami inong, asa hipas-hipas mulak tu Jakarta.

Sumber : Terjemahan bebas dari buku Cermin Kaca Retak, karangan Laris Naibaho